Нечаянная Радость: канон

Нечаянная Радость: канон

Икона Божией Матери «Нечаянная Радость»

Тропарь, глас 4-й

Днесь, вернии людие, духовно торжествуем, прославляюще Заступницу Усердную рода христианскаго, и, притекающе к пречистому Ея образу, взываем сице: о Премилостивая Владычице Богородице, подаждь нам нечаянную радость, обремененным грехи и скорбьми многими, и избави нас от всякаго зла, молящи Сына Твоего, Христа Бога нашего, спасти души наша.
 

Канон
Глас 4-й

Песнь 1

Ирмос: Отверзу уста моя, и наполнятся Духа, и слово отрыгну Царице Матери, и явлюся, светло торжествуя, и воспою, радуяся, Тоя чудеса.
Припев: Пресвятая Богородице, спаси нас.
Отверзшая двери милосердия Божия архангельское приветствие Тебе приносившему, не затвори и от нас утробы человеколюбия Твоего, Тя воспевающих.
Пресвятая Богородице, спаси нас.
Чудно бысть житие Твое на земли, Преславная Мати Дево, но Небесное Твое жительство чуднейше есть: непрестанно бо являеши чудеса матерняго Твоего милосердия Тя воспевающим.
Слава: Сына, от Отца безлетно раждающагося в последняя лета, зачала еси осенением Духа Святаго, вечную радость миру родивши.
И ныне: Радуйся, море, потопившее фараона мысленнаго – диавола. Радуйся, каменю, напоивший жаждущих жизни духовныя, даровала бо еси роду человеческому Избавителя плененных и Наставника заблуждших.

Песнь 3

Ирмос: Твоя песнословцы, Богородице, Живый и Независтный Источниче, лик себе совокупльшия, духовно утверди, в Божественней Твоей славе венцев славы сподоби.
Пресвятая Богородице, спаси нас.
Тя усердно песнословящих утверди в житии добродетельном и Рождшагося от Тебе усердно моли, да не лишени будем венцев славы грех ради наших.
Пресвятая Богородице, спаси нас.
Паче всякаго беззаконна человека в житии своем Сына Твоего грехи прогневляем, но, о Мати Милосердая, буди о нас Ходатаица.
Слава: Да сподобит нас венцев славы в Божественней Своей славе седяй со Отцем и Святым Духом Иисус Человеколюбец, рождейся от Тебе и власть имеяй человеком оставляти грехи.
И ныне: Радуйся, Дево, невместимаго Бога во чреве вместившая, и Того яко Младенца носившая, и сосцы Твоими питавшая.

Господи, помилуй (трижды). Слава, и ныне:
Седален, глас 5-й
Теплая Предстательнице и непобедимая, упование известное и непостыдное, стено, и покрове, и пристанище прибегающим к Тебе, Приснодево Чистая, Сына Твоего и Бога моли со Ангелы умирение дати миру, и спасение, и велию милость.
 

Песнь 4

Ирмос: Седяй в Славе на Престоле Божества во облаце легце, прииде Иисус Пребожественный Нетленною Дланию и спасе зовущия: слава, Христе, силе Твоей.
Пресвятая Богородице, спаси нас.
Спаса всему миру рождшая, и Сама спасаеши, Мати, от бед и печалей житейских Богородицу Тя исповедающих.
Пресвятая Богородице, спаси нас.
Исцели вся лютыя и неудобь исцельныя болезни наша, Мати Сына и Избавителя, на Крест грехи наша вознесшаго.
Слава: Ипостасная Премудрость, Бог Слово избра Тя в жилище Свое, Сего усердно моли, да спасет нас имиже весть судьбами.
И ныне: Радуйся, Невесто прекрасная, добрая. Радуйся, Голубице Чистая. Радуйся, Мати Еммануилева, Богородице Приснодево.
 

Песнь 5

Ирмос: Ужасошася всяческая о Божественней славе Твоей: Ты бо, Неискусоб-рачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.
Пресвятая Богородице, спаси нас.
Небо и земля удивляются, зряще милосердие Твое к роду христианскому, преславная Мати Дево, и к самым долу поверженным грешником нисходиши, Всеблагая.
Пресвятая Богородице, спаси нас.
Спаси от зол и скорбей рабы Твоя, Богородице, и мир Божий, пре-высший всякаго мира земнаго, подаждь рабом, Тя воспевающим.
Слава: Родила еси умиротворившаго Горняя и дольняя и сего ради на землю Сошедшаго, от Отца же и Духа Святаго не разлучившагося.
И ныне: Радуйся, Царице Небесе и земли. Радуйся, превысшая Ангел и Архангел. Радуйся, яко Тобою Иаковом предвозвещенный к нам Примиритель сошел есть.
 

Песнь 6

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.
Пресвятая Богородице, спаси нас.
Священное торжество ныне духовно совершающе, приидите, празднолюбцы, воспоим песньми Богоматерь, прославляюще Сына, даровавшаго толикую благодать Матери Своея.
Пресвятая Богородице, спаси нас.
Призри на пение рабов, Богородительнице, врагов видимых и невидимых смиряя вознесенную гордыню и на смиренныя изливая высокия милости Твоя.
Слава: Ты еси корень, от негоже произыде жезл Иессеев, Христос, Человек от дому Давидова и Бог Отцу и Духу Соприсносущный.
И ныне: Радуйся, Мати Обрадованная. Радуйся, прекраснейшая всех дщерей человеческих. Радуйся, благородная отрасль Богоизбраннаго рода Давидова.

Господи, помилуй (трижды). Слава, и ныне:
Кондак, глас 6-й
Не имамы иныя помощи, не имамы иныя надежды, разве Тебе, Владычице. Ты нам помози, на Тебе надеемся и Тобою хвалимся, Твои бо есмы раби, да не постыдимся.
Икос
Не ввери мя человеческому предстателъству, Пресвятая Владычице, но приими моление раба Твоего: скорбь бо обдержит мя, терпети не могу демонскаго стреляния, покрова не имам, ниже где прибегну, окаянный, всегда побеждаемь, и утешения не имам, разве Тебе, Владычице мира. Упование и предстательство верных, не презри моление мое, полезно сотвори.
 

Песнь 7

Ирмос: Не послужиша твари Богомудрии паче Создавшаго, но, огненное прещение мужески поправше, радовахуся, поюще: препетый отцев Господь и Бог, благословен еси.
Пресвятая Богородице, спаси нас.
Презрела еси вся красная мира, Чистая, Единому Богу возжелавши послужити, Емуже воспевала еси: отцев Боже, благословен еси.
Пресвятая Богородице, спаси нас.
Нас, всесовершенно благочестивым отроком не последующих, но прилепляющихся твари паче, неже Творцу, настави, Владычице, Единому Богу служити и воспевати: отцев Боже, благословен еси.
Слава: Даниил умныма очима предузре Тя, Христе, в камени нерукосечнем, разрушившем суетная царства человеческая, во спасение поющих Тебе со Отцем и Духом: отцев Боже, благословен еси.
И ныне: Радуйся, Горо, благодатию Божиею приосененная, от неяже отсечеся камень, Богом Отцем положенный во главу угла Церкве Своей, Христос, Емуже поем: отцев Боже, благословен еси.
 

Песнь 8

Ирмос: Отроки благочестивыя в пещи Рождество Богородичо спасло есть; тогда убо образуемое, ныне же действуемое, вселенную всю воздвизает пети Тебе: Господа пойте, дела, и превозносите Его во вся веки.
Пресвятая Богородице, спаси нас.
Слыши, Отроковице Дево Чистая, глагол, Гавриилом Тебе вещанный: родиши Сына, спасающаго воспевающих: Господа пойте, дела, и превозносите Его во вся веки.
Пресвятая Богородице, спаси нас.
Плотию от Тебе происшедый спасл есть от огня отроков, верою зревших Его. Того моли и нас спасти, пламенем страстей жегомых, Сыну же Твоему воспевающих: Господа пойте, дела, и превозносите Его во вся веки.
Слава: В пещи Вавилонстей виден был еси, Христе, яко Ангел светоносный, зраком же Сыну Божию подобный. Тебе со Отцем и Духом поем: Господа пойте, дела, и превозносите Его во вся веки.
И ныне: Радуйся, купино, Моисеем виденная, в последняя же лета от корене Давидова происшедшая и Спаса всех неизреченно рождшая, Емуже поем: Господа пойте, дела, и превозносите Его во вся веки.
 

Песнь 9

Ирмос: Всяк земнородный да взыграется, Духом просвещаемь, да торжествует же Безплотных умов естество, почитающее священное торжество Богоматере, и да вопиет: радуйся, Всеблаженная Богородице, Чистая Приснодево.
Пресвятая Богородице, спаси нас.
Бог, от Тебе воплотивыйся и к нам пришедый, содела чрево Твое Небес пространнейше. Дивное чудо: Невместимый во утробу Девы вмещается, да Сию поем во вся веки.
Пресвятая Богородице, спаси нас.
Неизреченно в последняя лета от Тебе Заченшагося моли, Богородице Дево, вся наша печали на радость преложити и света невечерняго нас сподобити, да Сию поем во вся веки.
Слава: Ты еси Престол славы Божия, Иезекиилем тайно узренный, яко Сына Божия, Отцу и Духу Сопрестольна, во Твою Пречистую утробу восприяла еси и Твоима матернима рукама носила еси.
И ныне: Радуйся, Храме одушевленный, в немже Бог плотию обита. Радуйся, Кивоте, славою Сына Божия приосененный. Радуйся, Bсeблаженная, Богородице Чистая, Приснодево.

 

«Кашин Православный», с 2010 года от Р.Х. ©